Sveitarfélagið Garðabær hefur gert samning við Þekkingu um hýsingu og rekstur á tölvukerfi bæjarins. Þekking hf. mun hýsa og annast allan rekstur á miðlægu kerfi sveitarfélagsins . Um er að ræða endurnýjun á eldri samningi, en Garðabær og Þekking eiga að baki langt og farsælt samstarf.
Viðurkenning fyrir Þekkingu
Stefán Jóhannesson, framkvæmdastjóri Þekkingar, telur að endurnýjun á samningnum sé mikil viðurkenning fyrir Þekkingu hf. „Garðabær er krefjandi viðskiptavinur enda er þetta metnaðarfullt og framsækið sveitarfélag sem leggur mikið upp úr því að nýta sér upplýsingatæknina sem víðast í rekstrinum. Það er því ákveðinn viðurkenning fyrir okkur hjá Þekkingu að ákvörðun hafi verið tekin um áframhaldandi samstarf í hýsingu og rekstri á kerfi bæjarins og erum við vongóð um að samstarfið verði jafn farsælt og verið hefur síðustu ár.“
Fjölbreyttir möguleikar í rekstrarþjónustu
Á síðust árum hefur Þekking fengið í þjónustu marga ólíka viðskiptavini og hefur það aukið enn á breidd fyrirtækisins í rekstrarþjónustu. Stefán segir það nauðsynlegt fyrir metnaðarfullt fyrirtæki í tölvuþjónustu að geta komið að mörgum ólíkum verkefnum og leyst misjafnar þarfir viðskiptavina. „Við höfum í gegnum tíðina sinnt mörgum af stærstu fyrirtækjum landsins og höfum nú einnig öflug sveitarfélög og stofnanir í hópi okkar viðskiptavina. Við höfum haft mikla sérhæfingu í rekstri á verslunarkerfum en erum nú með nýjum samningum við stór sveitarfélög komin með nokkra fótfestu á þeim markaði líka. Til viðbótar við okkar stærstu verkefni höfum við síðan með kerfisveitunni hjá okkur getað þjónustað minni fyrirtæki og boðið þeim á hagstæðu verði afar öflugt umhverfi fyrir sitt tölvukerfi. Við lítum svo á að ekkert verkefni sé of stórt eða smátt fyrir okkur og leggjum okkur fram um að leysa þarfir allra okkar viðskiptavina á skjótan og hagkvæman hátt.“
